УИХ-ын даргын 2024 оны 80 дугаар захирамжаар байгуулагдсан, УИХ-ын гишүүн М.Энхцэцэгээр ахлуулсан Эрчим хүчний салбарын шинэтгэлийн хүрээнд Эрчим хүчний тухай, Сэргээгдэх эрчим хүчний тухай, Эрчим хүч хэмнэлтийн тухай хууль болон холбогдох хууль тогтоомжийг шинэчлэн боловсруулах үүрэг бүхий ажлын хэсэг өчигдөр (2025.04.17) хуралдсан байна. Энэ үеэр УИХ-ын гишүүн, Ажлын хэсгийн ахлагч М.Энхцэцэг Дулааны эрчим хүчний тухай хуулийн төслийн талаар мэргэжлийн байгууллагуудын төлөөлөлд танилцууллаа.

Тэрээр хэлэхдээ, "Эрчим хүчний тухай хуулийн 320 заалт хэрэгжиж байгаа бөгөөд нийтлэг зохицуулагдаж буй 293 заалт, цахилгааны онцлог 18 заалт, дулааны онцлог 9 заалт хүчин төгөлдөр мөрдөгдөж байна. Дулааны салбарын тулгамдсан асуудлыг журмаар зохицуулж байгаа бөгөөд хүн ам, аж ахуйн нэгжийн зайлшгүй хангагдах ёстой суурь хэрэглээ, улирлын чанартай хэрэглээ, байршил, бүс нутгаар хязгаарлагддаг байдал, үнийн болон үнэ тарифын хязгаарлагдмал нөхцөл, зохицуулалт гэх зэргээс шалтгаалж Дулааны эрчим хүчний бие даасан хуультай болох шаардлагатай байгаа нь харагдсан. Иймээс Дулааны эрчим хүчний тухай анхдагч хуулийн төслийг салбарын мэргэжилтнүүдэд танилцуулах нь зүйтэй гэж үзсэн" гэлээ.

Хуулийн төслийг боловсруулахад зөвлөхөөр ажилласан Х.Эрдэнэчулуун хэлэхдээ, "Дулааны эрчим хүчийг тоолуураар тооцох, тоолуурын систем бий болгох, хууль бус хэрэглээг хуулиар зохицуулах шаардлагатай" гэсэн байна.

Мөн "Энэ хуулийн төсөлд одоо мөрдөгдөж буй хуульд тусгагдаагүй асуудал, хүний эрхийг хамгаалах зохицуулалтыг үзэл баримтлалдаа шингээхийг зорьсон. Юуны түрүүнд хэрэглэгчийг аюулгүй, найдвартай, үр ашигтай хангах төлөвлөлтөд анхаарсан" гэж Ажлын хэсгийн хуулийн зөвлөх С.Амаржаргал хэллээ.

Тус хуралдааны үеэр мэргэжилтнүүд дулааны эрчим хүчний асуудлыг зохицуулах хуулийн төслийг боловсруулан салбарын ажил нэг алхам урагшилж буйд талархалтай байгаагаа дурдаад, зөвхөн хэрэглэгчийн эрх ашгийг түлхүү анхаарах бус дулаан үйлдвэрлэгчдийн тулгамдсан асуудлыг тусгах шаардлагатай гэсэн байр суурьтай байгаагаа илэрхийлжээ. Түүнчлэн эрчим хүчний зохистой хэрэглээ, хэрэглэгчийн эрх үүрэг, хариуцлагын тогтолцоо, одоогийн Эрчим хүчний тухай хууль дахь гажуудлыг залруулах, эрчим хүч ашиглагч байгууллагуудын үнэ тарифын бодлогыг журамлаж, хуульчлах, хуулиар хамгаалагдсан хувийн өмчийн асуудлыг хэрхэх асуудлаар хуралдаанд оролцогчид хөндсөн гэж УИХ-ын ХМГ-аас мэдээллээ.

• #Мэдээ
• #Эрчим хүчний реформ