Дэлхийн банкнаас хөгжиж буй орнуудад цөмийн эрчим хүчний төслүүдийг санхүүжүүлэхэд тавьсан олон жилийн хоригоо цуцалж байна. Олон улсад цахилгаан эрчим хүчний өсөн нэмэгдэж буй эрэлтийг шийдвэрлэхийн тулд Дэлхийн банкны эрчим хүчний стратегид томоохон өөрчлөлт гарсан гэж тус банкны Ерөнхийлөгч Ажай Банга (2025.06.11) мэдэгджээ. 

Зургаадугаар сарын 10-нд болсон Дэлхийн банкны ТУЗ-ийн хэлэлцүүлгийн дараа энэхүү шийдвэрийг гаргажээ. ТУЗ-ийн гишүүд цөмийн эрчим хүчийг дэмжих талаар зөвшилцөлд хүрсэн ч байгалийн хийн үйлдвэрлэлийг санхүүжүүлэх талаар банкны байр суурьтай холбоотой маргаан шийдэгдээгүй байна. 

2013 онд Дэлхийн банк цөмийн эрчим хүчний төслүүдийн санхүүжилтийг зогсоож, нэн ядуу орнуудыг эс тооцвол 2019 оноос газрын тос, байгалийн хийн төслүүдийг дэмжихээ зогсооно гэдгээ 2017 онд амлажээ. Тус банкны бодлогын хамгийн сүүлийн өөрчлөлт нь 2035 он гэхэд цахилгаан эрчим хүчний эрэлт хоёр дахин өсөх төлөвтэй байгаа орнуудад цөмийн эрчим хүчийг дэмжих боломжийг ийнхүү нээж буй аж. 

Дэлхийн банкны 15.83 хувийн хамгийн том хувьцаа эзэмшигч болох АНУ нь уг банкны хөрөнгө оруулалтын багцад цөмийн эрчим хүчийг дахин нэвтрүүлэхийг удаан хугацаанд дэмжиж иржээ. Энэхүү шийдвэр нь АНУ-ын эрчим хүчний төрөлжсөн стратегийн бодлоготой нийцэж байгаа юм. Шинэчилсэн стратегийн хөтөлбөрийн хүрээнд Дэлхийн банк нь аюулгүй байдал, цөмийн зэвсгийг үл дэлгэрүүлэх, зохицуулалтын тогтолцоог дэмжих чиглэлээр Олон улсын атомын энергийн агентлагтай хамтран ажиллах аж. Мөн тус банк одоогийн цөмийн реакторуудын ашиглалтын хугацааг уртасгах, эрчим хүчний сүлжээг шинэчлэх, жижиг модульт цөмийн реакторуудын ашиглалтыг түргэсгэхэд хөрөнгө оруулахаар төлөвлөжээ. 

Хөгжиж буй орнуудын эрчим хүчний эрэлт хэрэгцээг хангахын тулд цахилгаан эрчим хүчний салбарт жил бүр 280 тэрбум ам.долларын хөрөнгө оруулах шаардлагатай байгааг Ерөнхийлөгч Ажай Банга онцолсон байна.  Мөн тус банк сэргээгдэх эрчим хүч, нүүрстөрөгчийн хийн олборлолт, далай тэнгисийн эрчим хүч зэрэг шинээр гарч ирж буй технологиудыг үргэлжлүүлэн дэмжиж буйгаа тодотгожээ. Түүнчлэн, зөвхөн газрын тосны олборлолтыг нэмэгдүүлэхгүй байх нүүрстөрөгчийн хийн төслүүдийг санхүүжүүлнэ.

Тэгвэл Герман, Франц, Их Британи зэрэг орнууд Дэлхийн банкны цөмийн эрчим хүчтэй холбоотой шийдвэрийг эргэн харна гэдгээ илэрхийлжээ. Уур амьсгалыг дэмжигчдийн зүгээс цөмийн болон байгалийн хийн төслүүдийн санхүүжилтийг нэмэгдүүлэх нь цэвэр эрчим хүч, уур амьсгалд дасан зохицоход яаралтай шаардлагатай хөрөнгө оруулалтыг бууруулж болзошгүй гэж үзэж байна. Байгалийн хий нь хөгжиж буй эдийн засгийн хувьд чухал "шилжилтийн түлш" хэвээр байгааг дэмжигчид эсэргүүцжээ.

Дэлхийн банкны эрчим хүчний шинэчилсэн стратеги нь санхүүжилтийн хүртээмжийг сайжруулж, улс орнуудад улам бүр ээдрээтэй болж буй эрчим хүчний бодлогыг чиглүүлэхэд тусална гэж Банга дүгнэсэн байна.